Santiago de Compostela, 19 de xuño de 2026

A conselleira de Medio Ambiente e Cambio Climático, Ángeles Vázquez, e o alcalde de Arbo, Horacio Gil, avaliaron hoxe varias iniciativas municipais para a mellora do servizo de saneamento na localidade.

En concreto, o rexedor informou á conselleira do interese do Concello por dotar de sistemas de depuración autónomos aos núcleos de Urzal e As Searas. Polas súa banda, Ángeles Vázquez explicou que o persoal de Augas de Galicia avaliará os proxectos técnicos que presente o Executivo local  para estudar tanto a mellor fórmula para executar os traballos como para financialos.

Nesa liña, a conselleira indicou que entre as posibilidades de solución a esta cuestión están as achegas que convoca anualmente o organismo de conca autonómico para a instalación de sistemas de depuración autónomos, con axudas de ata 20.000 euros para dar servizo a núcleos de poboación de entre 8 e 15 vivendas.

A maiores, no encontro a conselleira e o alcalde tamén analizaron un proxecto municipal relacionado co saneamento na Valouta. Neste caso, o Concello remitirá un proxecto para que poida ser avaliado polo persoal de Augas de Galicia.

Ademais, Ángeles Vázquez trasladou ao alcalde que proximamente se entregará a obra en execución do abastecemento integral ao núcleo de Arbo, que, cun investimento de 2,4 millóns de euros, dá resposta ás necesidades de 1.500 habitantes.

Nese senso, a conselleira puxo en valor o apoio técnico e económico que a Xunta vén prestando aos concellos desde hai anos para que poidan exercer as súas competencias en materia de abastecemento e de saneamento dun xeito máis eficiente.

Este apoio ás administracións locais reflíctese tamén nos orzamentos deste ano, cun orzamento global de Augas de Galicia de 151,7 millóns de euros (un 5,5% máis que en 2025) dos que 7 de cada 10 euros se destinarán a abastecemento e saneamento —108,7 millóns de euros— e case a metade —73,6 millóns de euros—, especificamente a investimentos para mellorar ou construír infraestruturas hidráulicas.