Consellería de Infraestruturas e Movilidade

CMATI

|
|
|
Compartir

Técnicos de Augas de Galicia localizan e eliminan un vertido de orixe industrial ao Río Grande no Concello de Coristanco

O foco contaminante foi detectado no transcurso dunha das inspeccións realizadas no marco do Plan de Control de Vertidos ao dominio público hidráulico

Santiago de Compostela, 14 de agosto de 2018.- O labor inspector dos técnicos de Augas de Galicia permitiu eliminar recentemente un vertido de augas residuais procedente dunha instalación industrial localizada no lugar de A Baña, no concello de Coristanco (A Coruña).

Durante a primeira inspección que se fixo á empresa no marco do Plan de Control de Vertidos, detectouse que as augas residuais procedentes da propia instalación se vertían directamente ao dominio público hidráulico sen ningún tratamento previo. Estas augas estaban a afectar ao río Grande, un afluente do Anllóns, ao seu paso pola fábrica.

Como resultado das sucesivas inspeccións á zona e dos requirimentos feitos por Augas de Galicia, a empresa instalou un sistema de tratamento axeitado para garantir a correcta depuración das augas residuais que xeraba e tramitou ante o organismo de conca a correspondente autorización administrativa de vertido.

Cómpre lembrar que a detección e posterior eliminación deste foco contaminante foi posible grazas ás tarefas de inspección realizadas por Augas de Galicia no marco do Plan de Control de Vertidos ao dominio público hidráulico, unha ferramenta esencial para acadar a máxima calidade das augas na Demarcación Galicia-Costa e detectar e corrixir puntos sensibles localizados nas redes municipais de saneamento.