CMATI Portal Augas de Galicia

No marco do Programa de Seguimento Ambiental do Plan de Abastecemento de Galicia, instalouse unha rede piezométrica para o estudo dos niveis freáticos de distintas masas de auga subterránea en 25 concellos de Galicia Costa.

A execución dos mesmos tivo lugar en varias fases e actualmente se realiza un rexistro horario dos niveis e unha extracción mensual dos datos. A continuación indícanse as principais etapas de desenvolvemento e control desta actividade:

• Selección das masas subterráneas a monitorizar e do punto concreto de execución. Esta foi establecida a partir das necesidades da Rede de Control de Aguas Subterráneas de Galicia e en función de diferentes criterios como: litoloxía, orixe da auga subterránea ou risco de seca, entre outros. Así mesmo para escoller o lugar concreto, para a instalación do piezómetro valoráronse outros factores como a accesibilidade da maquinaria ao punto de execución, nivel freático, titularidade da parcela, etc.
• Execución do piezómetro. Realizáronse perforacións de 150 mm de diámetro e un mínimo de 12 metros de profundidade co obxecto de conseguir chegar ata o nivel da capa freática. A técnica de sondeo utilizada foi perforación a rotación con recuperación de testemuño con sistema de refrixeración con auga limpa a fin de evitar a contaminación da auga subterránea.

A execución do piezómetro incluíu a colocación dun tramo de entubado de PVC ranurado de alta resistencia. Entre a parede do sondeo e o tubo instalado colocouse grava de sílice calibrada que permite a drenaxe da auga evitando areas e finos que poidan obturar o piezómetro.

Enriba colócase un tapón de bentonita que permita o illamento hidráulico do piezómetro para evitar a entrada de augas superficiais que poidan aumentar de forma errónea o nivel de auga subterránea natural. Así mesmo colocouse un tapón de fondo que permite que os fluxos de entrada de auga ao sondeo sexan exclusivamente horizontais.

No interior de cada piezómetro instalouse un limnígrafo electrónico para o rexistro automático das variacións do nivel de auga, da condutividade e da temperatura.

Con posterioridade, no período 2018-2020, Augas de Galicia desenvolveu dentro do programa de seguimento do estado das augas subterráneas establecido na Demarcación  Hidrográfica de Galicia-Costa unha renovación dos puntos de control, de maneira que proporcionen unha apreciación fiable do estado químico e cuantitativo de todas as masas de auga subterráneas, incluída a avaliación dos recursos dispoñibles, realizándose a construción de 11 novos piezómetros, dos cales 3 substituyen a xa existentes inoperativos, polo cal na actualidade a rede cobre 33 concellos de Galicia-Costa.

 
(*) Identificación dunha estación de medición, compatible co Sistema Europeo de Información sobre a Auga (Water Information System of Europe, WISE), usado no marco da información á Comisión Europea sobre os programas de vixilancia das aguas.